2009-06-30 17:48:37

Allt komið á rétt ról!

Núna er allt komið á rétt ról á þessum bæ. Magni byrjaður að vinna, ég byrjuð að leggja lokahönd á ritgerðina og við bæði dugleg í ræktinni.

Ég fór í smá aðgerð í gær. Fór að láta taka fitukirtla sem voru á höfðinu mínu, þeir eru búnir að vera í mörg ár en annar var orðin frekar stór þannig núna lét ég bara slag standa og skellti mér, var líka með afsláttarkort. Það voru teknir tveir og ég fékk að sjá þá og þessi stóri var á stærð við nóa kropp...ojjjjjjjjj Ég fór til bestu mömmu eftir aðgerðina og leið nú ekki allt of vel og var hálf furðuleg allan daginn. Er líka búin að vera hálf furðulega í dag en dreif mig nú samt út að snæða með Auði vinkonu.

Yfir og út

Viltu tjá þig? [Allt komið á rétt ról!] (Enginn hefur sagt orð)

2009-06-25 13:58:16

Mallorca í 2 vikur

10. júní fórum við Magni til Mallorca. Áttum ekki flug fyrr en klukkan 16 þannig við vorum bara í rólegheitunum heima þangað til um 12 leytið. Við keyrðum til Keflavíkur og fengum að geyma bílinn okkar hjá Öddu og Einari þar sem það er orðið frekar dýrt í fly bus rútuna. Flugið gekk vel, fengum góð sæti og horfðum á bíómyndir á leiðinni út þannig tíminn var fljótur að líða. Við lentum seint á Mallorca tíma og fórum því beinustu leið upp á hótel. Hótelið sem við vorum fyrst á hét Palma Bay Club og var við Arenal strönd.

11. júní vöknuðum við frekar snemma og mikið þreytt. Dýnan sem við fengum var mjög léleg og það var mjög hljóðbært á milli herbergja þannig við báðum um að því yrði kippt í lag. Fórum á fund hjá fararstjórna og fengum upplýsingar um hluti sem hægt er að gera á Mallorca. Eftir fundinn skelltum við okkur niður í bæ að skoða ströndina og bæjarlífið. Við hittum hressa Íslendinga og þeir sögðu okkur að þeir hefðu skipt um herbergi og hvöttu okkur til að gera slíkt hið sama. Við fórum þá og töluðum við hótelfólkið en fengum ekki nýtt herbergi fyrr en daginn eftir. Um kvöldið var skemmtidagskrá langt fram á kvöld og vorum við að skemmta okkur með fleiri Íslendingum.

12. júní skiptum við um herbergi. Það herbergi var miklu stærra og í annari byggingu. Það var því miður engin loftkæling þar en rúmin voru þægilegri. Við tókum því bara rólega um daginn. Við hljótum að hafa tekið því mjög rólega því að við tókum ekki einu sinni neinar myndir þennan dag!

13. júní vorum við Magni með þremenningunum í Palma. Klukkan 9 átti útimarkaður að byrja þannig við ákváðum að byrja daginn snemma. Við tókum strætó til Palma og fórum svo út þar sem markaðurinn var. Þetta var um km langur útimarkaður en það var alltaf verið að selja það sama, skartgripi, töskur, hvít föt eða perlur. Evran er svo fáránlega há að það var bara ekkert að borga sig að kaupa neitt. Við ákváðum að setjast niður og fá okkur að drekka og settumst á eitthvað kaffihús og pöntuðum okkur kók. Þegar reikningurinn kom voru við ekki mjög hress því að 330 ml af kóki kostaði 3,5 evru sem er um 700kr! Þetta er án efa dýrasta kók sem ég hef drukkið. Við ákváðum að skipta liði og stelpurnar fóru í mallið og strákarnir fóru að túristast. Eins og ég sagði fyrir ofan þá var evran bara það há að það borgaði sig ekki að kaupa neitt í mallinu, mig vantaði heldur ekki neitt. H&M var ekki í mallinu þannig við tókum leigubíl þangað því að ég var búin að ákveða að kaupa mér tösku þar. Ég keypti mér 3 hlýraboli og tösku og það var allt of dýrt! Nóttin var mjög erfið þar sem það var allt of heitt á hótelinu og við vorum því miður aldrei búin að ná heilli nótt í svefn og vorum orðin vel þreytt.

14. júní fóru Magni og Andri (strákurinn sem við hittum á hótelinu) í smá ferðalag á meðan við stelpurnar vorum bara heima að slappa af á hótelinu. Ég var þvílíkt spræk og skellti mér í sundleikfimi á hótelinu sem tók alveg á, eða allavega það mikið á að ég þurfti að leggja mig um miðjan daginn. Um kvöldið fórum við að borða á veitingastað við höfnina sem var mjög skemmtilegt. Eftir matinn trítluðum við eftir ströndinni og Magni og Andri fóru í leiktæki sem heitir kúlan og þá skutust þeir hátt upp í loft og svo aftur niður. Þeir fengu myndband af sér í þessu sem er mega fyndið að horfa á. Um nóttina fékk ég líklegast þvílíkan sólsting því að ég vaknaði við það að ég stóð upp, öskraði og hljóp öskrandi fram á gang og vaknaði við það að Magni sagði Hvað? Þá hafði mig dreymt að lítil fluga væri fyrir ofan mig og ég var eitthvað voðalega hrædd við hana. Mér leið alveg svakalega illa og langaði bara heim! Magni fór með mig niður í lobby og við fengum okkur vatn því að ég fór svo að hugsa til baka og fann það út að ég hafði ekki drukkið svo lítið yfir daginn og legið of lengi í sólinni. Við sátum því niðri í lobbyi og drukkum 3 lítra af vatni sem skilaði sér svo um nóttina með mörgum klósettferðum.

15. júní fórum við með þremenningunum í Aqualand sem er rennibrautagarður. Mig hefur lengi dreymt að fara í þannig og skemmti mér mjög vel. Ég er orðin eitthvað svakalega lífshrædd og þorði ekki í allar rennibrautirnar en þegar ég sá litla krakka renna sér niður í sumum rennibrautunum sem ég var ekki að þora að fara í þá ákvað ég að skella mér í nokkrar. Loksins fékk ég að fara í sundlaug sem er með svona öldum. Ég prófaði að fara þar sem ég náði ekki niður og var að synda í öldunum og vá það var mega erfitt, ég fór bara að hugsa um Titanic og leið mjög illa. Við sváfum lítið sem ekkert þessa nótt þar sem hitinn var 43 inni í herberginu og það var betra að sofa úti en inni! Úff!

16. júní fluttum við um hótel. Eftir mikið þras og nöldur við fararstjórann sem vildi lítið gera fyrir okkur fluttum við okkur um hótel. Það var í raun og veru tvennt í stöðunni hjá okkur, annaðhvort að skipta um hótel eða fara heim. Fararstjórinn sagði nú að það væri ekki flug heim en Magni sagði við hann að það væri alltaf flogið til London eða Köben og þaðan er hægt að fara heim. Fólk á hótelinu var ekki að trúa okkur en við vorum alveg búin að fá nóg! Fararstjórinn sótti okkur um 13 og keyrði okkur á nýja hótelið á Santa Ponsa svæðinu. Við fengum íbúðarhótel sem var rosa stórt og flott og með loftkælingu. Magni var ekki lengi að fara niður að ná í fjarstýringuna af loftkælingunni því að við vorum orðin ansi heit, medium well mundi ég segja! Við tókum upp úr töskunum og ætluðum að leggja okkur smá sem endaði með 3 tíma svefni, vorum ekki búin að sofa heila nótt frá því að við komum þannig þetta var mjög gott. Við fórum svo og trítluðum um bæinn og kíktum í verslun til að kaupa í matinn því að á þessu hóteli var ekkert innifalið. Verðlagið í búðinni var mjög svipað og heima en við vorum ekki með ofn þannig við gátum ekki verið með mjög fjölbreytta fæðu!

17. júní ætluðum við að leigja okkur hjól en við hittum Þórð sem er bekkjarfélagi minn úr þroskaþjálfanum sem var einnig á sama hóteli og við og hann sagði okkur að það væru ekki mikið af hjólastígum og ekki sérstakt að hjóla um þetta svæði hérna þannig við ákváðum að fara í Marineland sem er sjádýrasafn. Þar sáum við mjög skemmtilega höfrunga og páfagaukasýningu. Ég var svo ótrúlega stolt af okkur því að við tókum strætó í stað þess að taka leigubíl.

18. júní vorum við í algeri leti og gerðum ekki neitt! Eða við vorum mikið upp á hótelherbergi að lesa, horfa á myndir og ég að sauma. Voða gott að hvíla sig smá í fríinu. Um kvöldið fórum við Magni með Þórð út að borða og á koktelbar. Það var mjög skemmtilegt á koktelbarnum, stemningin var svo góð og við fengum kokteilana í mjög skemmtilegum glösum. Eigandinn er ung stelpa sem er alveg eiturhress og gerði allt fyrir viðskiptavinina sína.

19. júní legðum við okkur bíl og keyrðum frá klukkan 10-18 um eyjuna. Við fórum fyrst fjallagarðinn sem var mjög skemmtilegt að fara. Vegurinn var mjög hlykkjóttur eftir fjallinu og mér var orðið frekar flökurt á þessum hlykkjum en lifði það nú samt að. Við stoppuðum á mörgum stöðum og tókum fullt af myndum. Vegurinn til Inka var lokaður á einum stað þannig við þurftum að taka aðra leið til að komast þangað. Ég vildi endilega fara í Inka og kaupa mér eitthvað leður, t.d. leðurtösku en allt var svo svakalega dýrt að við enduðum á að kaupa bara belti á Magna. Við kíktum svo í búðina að kaupa okkur í matinn og brunuðum heim og tókum rólegt kvöld.

20. júní vorum við áfram með bílinn og byrjuðum á því að keyra í bæinn þar sem frægu Mallorca perlurnar eru seldar. Við fengum að sjá hvernig perlurnar eru búnar til og ég ætlaði að kaupa mér perlur þarna en enn og aftur þá voru þær mega dýrar þannig ég sleppti því. Við urðum líka fyrir smá vonbrigðum því að perlurnar eru búnar til úr milkglass innflutt frá Japani. Við héldum svo ferð okkar áfram og fórum í Drekahellanna. Við trítluðum um hellanna og í lokin var sýning. Það var vatn neðarlega í hellunum þar sem bátar komu og á bátunum var fólk sem spilaði á hljóðfæri og hélt tónleika fyrir okkur. Það var alveg rosalega flott. Við fengum svo að taka bátanna til baka sem var skemmtileg upplifun. Eftir hellanna keyrðum við upp að annari strönd hér á Mallorca og skoðuðum þar um. Síðan brunuðum við heim, sem tók svo sem ekki langan tíma þar sem eyjan er svo lítil og skiluðum bílnum.

21. júní röltuðum við um bæinn og versluðum smá túristadót, skelltum okkur líka út á hjólabát en ég varð pínu sjóveik þannig við vorum ekki svo lengi úti á hafinu. Magni keypti handa mér rosa flotta eyrnalokka. Við hittum Þórð á leiðinni heim og buðum honum í mat til okkar. Ég eldaði hakk og spagettí sem bragðaðist nokkuð vel miðað við að ég notaði enginn krydd og var með voða lítið að tækjum til að gera matinn betri. Við kíktum svo aftur á koktelbarinn og vorum langt fram á nótt að spjalla saman og hitta fulla Íslendinga!

22. júní fórum við út í sundlaug og sátum í sólbaði í smá tíma. Það tekur mikið á að fara í sólbað þannig eftir sólina fórum við upp á herbergi að leggja okkur. Um miðjan daginn ákváðum við að skella okkur í göngutúr og fengum okkur Kebab og bananasplitt og nutum útsýnisins. Rosalega góð afslöppun. Um kvöldið kíktum við í heimsókn til Þórðar og höfðum spila og ostakvöld.

23. júní skelltum við okkur í köfun. Andri kom með okkur. Við tókum leigubíl að köfunarstaðnum og fengum útbúnað fyrir köfunina. Þurftum að máta gallanna og blöðkurnar. Við þurftum að keyra smá spott til að fara að köfunarstaðnum og svo dembdu við kútnum og öllu draslinu á bakið. Ég hélt að ég fengi nú verki í fótinn útaf auka þyngdinni en svo var ekki. Það virðist vera í lagi að auka á mig þyngd eins og að halda á pokum líka en strax og ég fer að ganga á marmara eða snúa mér mikið í hringi á fætinum þá verður mér illt. En já við fórum að bakkanum og ég strax alveg að panika, ég var rosalega hrædd! Magni fór bara strax út í og kunni þetta alveg, enda er hann með köfunarréttindi. Ég var ekki alveg að fíla þetta og var við bakkann í smá tíma með kennara. Kennarinn var voða þolinmóður. Ég átti voða erfitt með að anda með súrefninu í kafi, of andaði alveg. Ég fór aðeins niður á botn en var ekki að þola það. Ég hélt mig því uppi á yfirborðinu en var nú samt að kafa. Það voru teknar mjög skemmtilegar myndir af okkur og sérstaklega strákunum þar sem þeir fóru alveg niður í botninn. Ég var alveg búin eftir þessa köfun og við vorum bara róleg það sem eftir var að deginum en skelltum okkur út að snæða um kvöldið á rosa fínum veitingastað þar sem ég fékk loksins alioli sósuna sem allir voru búnir að tala um. Á þessum degi á Spáni er fiesta og fara þá spánverjar niður á strönd með kerti og klukkan 12 að miðnætti fara þeir ofan í sjóinn með kerti og með því af syngast þeir. Við þurftum auðvitað að taka þátt í þessu og sátum á ströndinni í langan tíma og skelltum okkur svo út í vatnið. Mjög gaman að taka þátt í þessu.

24. júní var heimfaradagurinn. Sem betur fer fengum við að hafa herbergið til klukkan 20 um kvöldið því að rútan kom ekki að sækja okkur fyrr en 20:30 og það hefði verið frekar þreytandi að hafa engan samastað allan daginn. Við sváfum til næstum 12 að hádegi (10 að íslenskum tíma) og skelltum okkur svo út í göngutúr og ákváðum að fara í siglingu. Hittum Þórð fyrir utan siglingarbásinn og hann ákvað að koma með okkur. Kostaði bara 10 evrur á mann fyrir 2 tíma siglingu. Siglinginn gekk vel til að byrja með en svo byrjaði mér að líða illa og síðasta klukkutímann var ég ekki í sambandi því að mér var svo óglatt!!! Mér var frekar óglatt allann daginn eftir þetta og leið ekki vel áður en ég fór í flugið, var í raun og veru enn með ógleðina þegar ég kom heim. Við þurftum ekki að bíða lengi á flugvellinum, við fengum góð sæti og vorum með 3 sæti útaf fyrir okkur. Ég náði ekkert að sofna og þegar við komum heim um 3 leitið þá var ég orðin vel þreytt. Við drifum okkur að ganga frá og núna er eins og við höfum bara ekkert farið, bara rosa mikið að þvotti.

Yfir heildina litið þá var ferðin mjög fín þrátt fyrir hryllilega hótelið fyrstu 6 daganna. Ég er búin að fara að tala við Heimsferðir því að fyrstu 6 daganna var þetta ekki mikið frí fyrir okkur Magna. Það verður spennandi að sjá hvað kemur út úr því. Ég ætla fljótlega að skella inn myndum. Tókum um 7 GB af myndum og er því nóg að skoða.

Viltu tjá þig? [Mallorca í 2 vikur] (4 hafa tjáð sig) [2009-06-30 01:38:36]

2009-06-10 10:56:48

Miðvikudagur

Síðan er eitthvað búin að vera að stríða mér og margir hafa ekki komist inn á hana þannig ég var ekkert að eyða tíma mínum í að blogga

En það er allt gott að frétta af mér. Helgin var mjög fín. Vorum hjá Pabba Magna og Rúnu á föstudagskvöldið. Ég var að hjálpa Rúnu að fara yfir próf og Magni fékk líka smá að hjálpa Við trítluðum svo heim frá þeim og ég fann ekki neitt til í fætinum við það Ég var alveg himinlifandi yfir því, vonandi er þetta að koma núna. Finn það að mér verður mikið illt þegar ég er heima að ganga mikið þannig ég þarf að fara að finna mér góða inniskó.

Á laugardaginn kíktum við í heimsókn til ömmu og afa Magna og ég tók allt í gegn heima. Um kvöldið komu Frikki og Hildur í mat sem endaði svo niðri í bæ á dansgólfinu. Það var alveg æðislega gaman í bænum, bjart allan tímann, frekar furðulegt samt.

Ég fór bara hægt um á sunnudeginum en á mánudaginn komu Björk og Inga og við vorum bara í leti. Inga er búin að vera ótrúlega góð við mig og saumaði 2 kjóla á mig og 2 ermar. Svo hjálpaði hún mér að stytta buxur sem ég keypti árið 2007. Þannig ég á slatta af nýju fötum núna.

Ég bjó til síðu um daginn. Pabbi tók þessa mynd á fermingardaginn hennar Erlu. Ég er mjög ánægð með þessa síðu.

Svo er ég komin svona langt í jólateppinu sem Rúna fær



Og svona er ég komin langt í 15 ára teppinu

 

Viltu tjá þig? [Miðvikudagur] (1 hefur tjáð sig) [2009-06-27 22:41:22]

2009-06-02 07:48:03

Yndisleg helgi

Ahh gott að hafa svona langa helgi. Ég byrjaði á bútasaumskodda sem ég ætla að hafa í nýja fína sófanum okkar. Ég er að gera hann úr afgöngum, fór til mömmu og fékk nokkra afganga hjá henni líka Er að spá hvort ég eigi að gera 2 eða 4 kodda? Hvað finnst ykkur?

Við Magni fórum í Road trip á sunnudaginn á æskuslóðir ömmu hans. Það var rosa gaman, tóku með nesti og snæddum það á leiðinni.

Au ég er búin að finna nýtt tæki í world class, ég hef ekki hugmynd hvað það heitir en það er voða svipað og skíðavélin bara þyngra og reynir meira á Ég prófaði það í tvisvar 2 mínútur í gær og það gekk nokkuð vel. Var samt frekar illt í fætinum þegar ég vaknaði en það getur líka verið útaf ég var að standa smá í gær þegar ég var að skera og labba á milli strauðborðsins og saumavélarinnar. Hlakka mega til á morgun að fara í WC og prófa aftur

Í dag er annar saumadagur. Inga vinkona ætlar að hjálpa mér að sauma 2 kjóla

Just came in:

Þegar ég var búin að blogga þá athugaði ég hvort ég væri búin að fá einkunn og ég var búin að fá eina Fékk 8,5 í Barnið þitt er nemandi minn. Núna er ég búin að fá tvær 8,5 og það í Háskóla. Ég ætti að fara með einkunirnar mínar til kennaranna sem sögðu mér það í grunnskóla að ég gæti ekki lært og bara in your face Meðaleinkuninn mín er 7,94

Viltu tjá þig? [Yndisleg helgi] (5 hafa tjáð sig) [2009-06-08 22:26:11]

2009-05-21 19:22:19

Sumardagur

Þetta er búið að vera mjög góður dagur. Við sváfum lengi vegna þess að ég vakti lengi í nótt þar sem ég var hjá Þuru vinkonu að horfa á American Idol. Hafði fyrr um kvöldið farið á Rauðará að snæða með stelpunum sem útskrifuðust með mér úr þroskaþjálfunum fyrir 2 árum. Tíminn fljótur að líða.

Þegar ég vaknaði þá sá ég fyrsta skemmtiferðaskiptið við höfnina. Mér finnst svo rosalega gaman á sumrin að fylgjast með skipunum koma og fara. Mér finnst vera svo stutt síðan ég sá síðasta skipið fara.

Við skelltum okkur á æfingu. Ég var búin að ákveða það að prófa að hlaupa þar sem ég þurfti að hlaupa um daginn og fann ekki til í fætinum þegar ég hljóp. Það gekk nú samt ekki nógu vel á tækinu í world class. Náði samt að hlaupa í 2 mínútur og fann ekki mikið til, en þurfti að halda mér í, annars missti ég jafnvægið. En svo tókum við Magni hörkuæfingu. Hittum svo vinafólk okkar og við ákváðum að skella okkur saman að snæða.

Við kíktum svo til pabba að skoða nýja tjaldvagninn og hittum þar Sigrúnu og co.

Núna erum við að grilla læri. Hef aldrei grillað læra áður og þegar ég er að elda eitthvað í fyrsta skiptið þá býð ég engum í mat. Ef þetta heppnast vel þá veit ég það að ég get boðið fólki í grillað læri.

Annars var ég að fá einkunn fyrir Menning og samfélag II og ég fékk 8.5 Meðaleinkunnin mín er núna 7.9. Ég er ótrúlega stolt af því

Farinn að snúa lærinu.

Viltu tjá þig? [Sumardagur] (Enginn hefur sagt orð)

2009-05-17 20:46:19

Jóhanna Guðrún

FRÁBÆR EUROVISIONDAGUR

Við Magni byrjuðum daginn á að mæta á æfingu og fórum í Turninn í Kópavoginun. Aðstaðan þar er rosa fín og frekar fátt fólk sem mætir þar um helgar. Eftir æfingu skelltum við okkur niður í Toyota að skoða bíla og líka taka þátt í Toyota deginum. Fengum pulsur og ýmislegt góðgæti ásamt því að bílinn okkar var þrifinn.

Eftir Toyota brunuðum við til Frikka og Hildar. Frikki kom með okkur að kaupa í kvöldmatinn og var farið í nokkrar búðir að finna rétta kjötið. Veðrið var svo gott og ég fann bara hverng allir voru bara í svo góðu skapi útaf kvöldinu.

Við snæddum svo öll saman heima hjá Frikka, Hildi og Evu. Maturinn var mjög góður. Síðan byrjaði Eurovision og áður en ég vissi að var Jóhanna Guðrún byrjuð að syngja og ég fékk mega gæsahúð. Keppnin hélt svo áfram og mesta spennan var í stigagjöfinni. Við vorum með parakeppni sem var þannig að ég og Magni vorum með oddatölurnar og Hildur og Frikki með sléttutölurnar, semsagt hvort Ísland lenti í oddatölu eða sléttutölu sæti. Þar sem Magni hélt að við mundum taka þetta þá völdum við oddatölurnar, líka þá vorum við með fleiri líkur því að það eru 25 lög í keppninni. En nei við töpuðum veðmálinu. Verðlaunin voru sú að parið sem tapaði á að bjóða í mat innan 3 mánaða með ákveðnu víni sem Frikki heldur ekki vatni yfir. Kvöldið var æðislegt í alla staði og mörg mjög skemmtileg lög. Búin að setja 10 lög á ipodinn minn.

En já ekki má gleyma því að ég kaus Noreg

Yfir og út

Viltu tjá þig? [Jóhanna Guðrún] (1 hefur tjáð sig) [2009-05-18 22:06:35]

2009-05-15 14:16:59

Flöskudagur!

Ahhh...ætla aðeins að setjast niður og skrifa nokkur orð Er kósveitt að þrífa allt hátt og látt. Er algerlega að massa þrifin í dag. Er að hlusta á Palla á rás 2 spila Eurovision lög og syng hástöfum með.

Já aðalfréttin er sú að Öddi og Anika áttu stelpu í nótt. Man ekki alveg hvað hún var stór en ég man að mamma sagði 13,5 mörk og 50 og eitthvað cm.

En auðvitað var horft á Euro í gær og mín spá var sú að þessi lög kæmust áfram, þau lög sem eru með stjörnu* fyrir aftan komust áfram.



Króatía*
Ireland
Norway*
Slovenia
Azerbaijan*
Greece*
Moldova*
Albania*
Ukraina*
Estonia*

Ireland og Slovenia komust ekki áfram heldur Danmörk og Lithuania.

Sko ég hafði nokkuð rétt fyrir mér.

Jæja núna ætla ég að ráðast á tölvuherbergið, ætla að endurraða og gera fínt, var að kaupa kassa til að flokka í

Viltu tjá þig? [Flöskudagur!] (1 hefur tjáð sig) [2009-05-15 15:38:12]

2009-05-13 08:44:33

ÁFRAM ÍSLAND!!!

Júróvísíón var í gær...fór líklegast ekki framhjá neinum

Það var lítið Júróvísíónpartý á þessum bæ. Erla besta frænka kom og við þrjú höfðum það mjög kosý saman. Bjuggum okkur til pizzu og keyptum smá nammi.

Fólkið á þessum bæ hélt að þessi lönd kæmust áfram:

Svartfjalland
Hvíta Rússland
Svíðþjóð
Armenía
Andorra
Sviss
Tyrkland
Ísland
Rúmenía
Finnland

Uppáhaldslagið mitt af þessum er auðvitað Ísland og svo Finnska lagið finnst mér svalt.

Lögin sem komumst svo áfram voru:

Svíþjóð
Armenía
Tyrkland
Ísland
Rúmenía
Finnland
Ísrael
Portúgal
Malta
Bosnia and Herzegovina

Ég og Erla öskruðum þegar Ísland komst áfram. Mig langaði bara að fara að gráta af ánægju.

Við höfðum semsagt 6 lög rétt.

Farinn að læra eftir góða æfingu

Viltu tjá þig? [ÁFRAM ÍSLAND!!!] (1 hefur tjáð sig) [2009-05-13 14:46:34]

2009-05-11 09:04:24

Mánudagur

Ég sit núna í vinnuherberginu okkar M og er að snæða hafragraut sem ég bjó mér til. Ég og M fórum á æfingu í morgun. Sofnuðum sko 21:30 og vöknuðum 6:30 þannig við ákváðum að nýta daginn vel Ástæðan fyrir því að við sofnuðum svona snemma er sú að Öddi bróðir var með svaka partý á Ruby á laugardagskvöldið og við vorum þar alveg langt fram á nótt þannig við vorum enn að jafna okkur eftir teitið, við erum orðin svo gömul.

Vikan er búin að vera mjög fljót að líða hjá mér. Magni fór út á þriðjudaginn síðasta og kom heim á laugardaginn. Á meðan var ég ein í kotinu og hafði sko nóg að gera. Skrifaði lokaritgerð á daginn og fékk til mín fullt af fólki í heimsókn á kvöldin ásamt því að fara á skrapphitting í fk-skrapp. Besta frænka gisti líka hjá mér eina nótt og við skemmtum okkur alveg konunglega. Ég náði að gera nokkur kort á skrapphittningnum og minni á að ég er enn að selja kort á aðeins 300kr. Aðrir kortagerðamenn eru að selja þau á 500kr og mamma sagði mér að eitt fermingarkort út í búð kostar um 600-700kr. Kortin mín eru heimagerð með umslagi og eru í sellófanni þannig þau geymast vel.

Ég er alveg að massa bútasauminn og er að vinna aðalega í tveimur teppum núna. Er að gera jólateppið sem ég er að gera handa Rúnu og svo 15 ára teppinu mínu. Ég keypti efnið rauða sem ég hef mikið verið að tala um síðustu bloggfærslur. En hér eru myndir af því sem ég er búin með. Kláraði að vísu allar dúllurnar í jólateppinu um helgina en þær eru 19.

Farinn að skrifa lokaritgerðina

 

Viltu tjá þig? [Mánudagur] (4 hafa tjáð sig) [2009-05-14 22:31:17]

2009-05-04 07:42:37

Meira blogg

Guvuð ég gleymdi að blogga um það að ég fór í bæinn á fimmtudagsvköldið Það var partý í vinnunni hans Magna og síðan um nóttina ákvað ég að skella mér niður í bæ þar sem Björk og Inga voru að djamma. Hitti þær á Ölstofunni og skemmti mér sko mjög vel.

Ég er enn að hugsa um þetta efni. Ég og Magni erum búin að vera að reikna út hversu mikið efni ég þarf að kaupa og ég fann upp mjög sniðuga formúlu. Mamma hlakka til að segja þeir frá henni þar sem við erum alltaf að vandræðast með þetta fram og til baka

Ég vaknaði ofursnemma í morgun Var með svo mikla verki í fætinum að ég vaknaði Það er sko ekki þægilegt tilfinning

Jæja Þura vinkona er að koma og við erum að fara að læra

Viltu tjá þig? [Meira blogg] (Enginn hefur sagt orð)